Energia elektrikoaren autokontsumoa da elektrizitatea norberak kontsumitzeko ekoiztea
Autokontsumo-instalazioak isolatuak izan daitezke (sarera fisikoki konektatu gabe) edo sareari konektatuta egon daitezke.
Instalazio isolatuetan, sarearekin konexio fisikorik ez dagoenez, kontsumo elektriko guztia sorkuntza-instalazioaren bidez hornitu behar da; aldiz, sareari konektatutako instalazioetan helburua kontsumo elektrikoaren zati bat betetzea da eta, hortaz, saretik elektrizitate gutxiago erostea, faktura elektrikoa merkatuz.
Horrenbestez, instalazio isolatuak Sistema Elektrikotik kanpo daude eta konektatutako instalazioak, berriz, Sistema Elektrikoan sartzen dira.
Sistema Elektrikoan energia elektrikoa sortzeko modu tradizionalean sorkuntza-eskema zentralizatua izaten da, norabide bakarrekoa eta eskariaren eragina kontrolatzeko neurri gutxi ditu. Gaur egun, eredu horretatik elektrizitatea sortzeko banatutako beste eredu baterantz aldatzea ahalbidetzen duten aukerak izan badira; eredu berri horietan,edozein kontsumitzailek bere energia elektrikoa sor dezake, gehienbat potentzia txikiko instalazioekin eta tokiko energia-iturri berriztagarriak erabilita.
Autokontsumoak eta banaketak abantailak ditu, bai kontsumitzailearentzat, zein energia sistemarentzat. hauxek dira azpimarratzekoak:
-
Kontsumitzaileak energia eta dirua aurrez ditzake instalazioaren bizi osoan, hasieran inbertsio txiki bat eginda. Instalazioa energia elektrikoaren ordukako eskariaren arabera dimentsionatu behar da.
-
Ez dakar kosturik Sistema Elektrikoarentzat, eta ez du primarik behar ekonomikoki errentagarria izateko.
-
Energia elektrikoa sortzen den tokian bertan kontsumitzen denez, autokontsumoan elektrizitatearen garraioarekin eta banaketarekin lotutako galerak murrizten dira. Banaketa-sarean saturazioak murrizteko eta eskari elektrikoaren kurba leuntzeko ere lagungarri da.
-
Mesedegarria da horniduraren segurtasunerako eta bermerako, baita sistemaren eraginkortasun ekonomikorako ere, eta Europar Batasunak energia berriztagarrien arloan ezarritako helburuak betetzen lagun dezake, beste sustapen-mekanismo batzuek baino kostu txikiagoarekin.
-
Erregai fosilen kontsumoa eta kanpoaldearekiko mendetasun energetikoa murrizten ditu.
-
Kutsatzen duten gasen emisioak murrizten laguntzen du; horrela, bada, klima-aldaketaren aurka borrokatzeko ingurumen-helburuak betetzea eta airearen kalitatea hobetzea ahalbidetzen du.
-
Ekonomia- eta industria-jarduera bultzatzen du, enpresen lehiakortasuna hobetzen du eta lana sortzea sustatzen du.
-
Energia-ereduaren demokratizaziorako lagungarri da, sistema elektrikoaren kontsumitzaile eta erabiltzaileei eginkizun aktiboagoa emanez.